Freitag post Alexij (19.VII.): Kunig der jarkoch in gehorsam (Gefängnis) genohmen, darumb das er des raths bevelh uberschriten.
Vigilia Laurentii (09.VIII.): ist her Gregor pfarrer zu Leuben mit dem pauer Gotze gnant, der noch (nach) ime mit eynem kenchen (Kännchen) geworfen, vorgetragen, sollen beider seits fridlich gegen einander halten und nicht bruchig werden. Ist dem burgermeister angelobet, sal der pauer den gerichten zu abtrag 1 ß (Schock Groschen) geben.
Vigilia assumptionis (14. VIII.): ist des kuchenmeisters hausknecht gefengklich angenohmen, darumb das er Thomas von der Heyden mit blosem wehr uberlauffen, mit zusage, das derselbige Hausknecht uff Thomas von der Heyden ansuchen uff gleich und recht solle behalden werden.
Vigilia assumptionis (14. VIII.): Sauppe sal dem richter 16 gr. geben, darumb das er in Fabian Fladen hauße mit Worten gefrevelt und sunderlich got gelestert. Davor ist Paul Kolig burge.
Mitwoch nach Bartholomei (28. VIII.): sind Nickel Nahel und der schwartzferber im Loche [Stadtteil Dresdens] zu bornmeister vorordent.
Freitag post Augustini (30. VIII.): Dy hausgenossen sollen dy katzbach helffen reumen nach alder gewonheit. Welcher es nicht vormag, soll nach seinem vormogen uffs baumeister erkentnus gelt geben.
Dinstag post Egidii (03. IX.): ... das all dyjhenigen, so ecker an wegen und greben haben, sollen dy grebin helffen reynigen und auffs nau auswerffen, damit dy wege gebessert.
Freitag post Galli (18. X.): ist gerathschlaget von wegen Caspars des gerichtsdyners seines frevels halben, der er in richters hauße begonnst (begangen), unnd beschlossen, man wolle sich des rechten bey den von Leiptzk belernen.
Mitwoch Post Simonis et Judä (30. X.): beschlossen, das Hansen Heringen sein burgerrecht, inmassen Mats Poppen und andern gescheen, wegen seins ungehorsams werde uffgesagt, sein wohnung anderswo zu vorsehen.
Sabatho post omnium sanctorum (09. XI.): Hans Heringen sein burgerrecht uffgesagt ut supra, darumb das er nicht in gehorsam gegangen uff bevelh des raths, so er doch den knechten bey treuen und eren und verlihrung des handwergs angelobet, irem bevelich sich zu halden.
Mitwoch nach Martini (13. XI.): ist von des raths wegen her Wentzel Kuhmollern altaristen gesagt, weil bey ime vorgangen tag am abend in seiner feurmaur feur auskomen und nicht gemeldet, derwegen er dem rathe ein silber schock zu geben pflichtig und bußfellig wurden. Wil eyn rat sulch schock doch uff ferner bedencken uff sein entschuldigung und bitt itzmahls bey sich halden, mit anzeigung, das er ferner pleyssiger in seim hause auffsehen und sich boser oder vordechtiger personen enthalden wolle, domit von seinetwegen keine vorwarlosung oder schaden entstehen und seiner person unvordechtig und unbeschuldenbleiben mogen.
Vigilia Barbarä (03. XII.): Nickel Reichel von Aldendresden und die lange Lorentzen sind mit zu kurtzen elen (Ellen) begriffen. Ist in dismahl nachgelassen, doch mit anzegung, man sye wider betroffen, sie mit straff des rechten vorzunehmen.
Vigilia Nicolai (05.XII.): Hans Hering ist wieder ausm gehorsam gelassen, dorin er genommen, das er dem richter und rathe zum offtern, wan man noch im geschickt der schulde halben, ungehorsam aussenbliben, mit anzegung, nachdem im zuvor sein burgerrecht auffgesagt und er sich doch nicht dornach gehalten, das er zwuschen hir und fastnacht vorkeuffen sal.